Letzti Abrächnig

Dir heit Schmerz gsäit, dert wo ich dr Same vor Hoffnig vergrabe ha. Eifach beurteilt, verurteilt und euch när abgwändet.

Dert wo ich es Liecht ha erzündet, heit dir Wasser drüber gläärt.

Dir heit mis Füür glöscht.

Erstickt und d Energie ussezoge.

Alles woni dri gsteckt ha, heiter ussem Fenster gschmisse.

So als wärs nüt.

Unspektakulär.

Nüt grosses, wertlos, eifach en normali Selbstverständlechkeit.

Ich ha euch jede Tag d Liebi zu de Bewohner zeigt, trotz allem Kummer, trotz em Schmerz. Ich bin jede Tag da gsi, immer pünktlech, nie krank, nie z spät.

Ich ha jede Tag 150% vo mir gäh, mich abgrakeret, mich iigsetzt und dir trättet mis Wärk mit Füess.

Scho okay, ich bin mir das gwahnet. Überrasche duets mich nöd, aber nach allem wo ich für euch gmacht ha, verletzts mich. Erfolglos hani versuecht euch z zeige, wer ich bin und welli Wert ich vertritte.

Sache wo mir wichtig si, hani offegleit.

Da körts halt au derzue, negativi Aspekt azspräche und z signalisiere.

Egal wär vor eim staht.

Mir i eusem Job hei e riesse grossi Verantwortig, me söt die wahr näh.

Au we dir alli säget, dass ihr das machet, hani eu ufzeigt, dases ebe nid so isch.

Mir ischs immer egal gsi, wer vor mir staht. Mir ischs gliich welli Position du vertrittsch, erledige du zersch dini Arbeit so gwüssehaft und perfekt wie ich und denn rede mir nomal drüber.

Di Status schützt dich nöd vor dire Verantwortig.

D Lüüt wofür mir zueständig si, sis wärt das mir jede Tag 100% gäbe.

Sie heis verdient, es isch ihres Recht.

Die Würde des Menschen ist unantastbar. PUNKT.

Und nei, ich han vo niemmerem verlangt, daser so perfektionistisch isch, wie ich.

Das isch mis naturell.

Das bin ich, dür min Arbeitsstolz und au dür mini Erkrankig.

Bi mir gits nie halbi Sache.

Ich mach z Züg richtig und wenni das nöd cha gwährleiste lahnis la si.

Mir si d Mönsche wichtig, ich nimm mini Verantwortig wahr.

Genau deswege erledige ich au jede Tag 1000 Sache, woni gar nöd müesst, nur will ich wot dases gmacht isch.

Es wär nid mini Verantwortig.

Es wär bi euch.

Nei ich han kei Angst öpper z kritisiere, wenns um d Gsundheit, s Rächt und d Würd vo de Bewohner gaht.

Sorry.

Mini Mam seit immer, dass Angst en schlechte Wegbegleiter isch.

Ich stimme ihre zu 100% zue.

Klar hets Situatione gäh, wo ich mich im Ton vergriffe ha, nur hani gmerkt, dases jedem Mal passiert.

Dr Unterschied isch nur, dases eu nid aghänkt wird.

Euch wird so vieles nid aghänkt, dir chöit wiiterhin blind und stumm dür d Welt renne. Machet nur.

Mich betriffts nüm.

Ich bin bald gange.

Im Gegesatz zu eu, isches mir wichtig, das ich am Ändi vom Tag no mit Würde in Spiegel chan luege.

Das heit dir mir nid chönne näh.

Das wärdet ihr au nid schaffe.

Denn dr Unterschied zwüsche mir und euch isch, das ich mini Baustelle kenne.

Ich weiss ganz genau, a wellne Sache ich muess arbeite.

Ich kenne mini Fehler, ich kenne mini Giftsätz, ich kenne mini Erkrankig.

Ich kenn mich viel besser als ihr euch.

Und dert wo dir mini Leistig probieret z reduziere und als selbstverständlech z betrachte, gseh ich min Wert.

Denn im Gägesatz zu eu, weiss ich, wie viel inneri Kämpf und Ussenandersetzige es bruucht het, mich zu dem z forme wasi itz bi. Mir isch bewusst, dass mini Leistig absolut nöd selbstverständlech isch.

Nöd mit mim Hintergrund.

Oft hani eu probiert z vermittle, warum ich so bin und agiere, aber dir heit euri Ohre verschlosse und mir nid zueglost.

Statt mini Leistig z wertschätze und z würdige, heit dir agfange mitem Finger uf mich z zeige und z Muul über mich z zerisse. Niemmer vo eu het z Rückgrat ka, mich mal azspräche und z frage was los isch.

D Frag wie gahts dir schiint eu eh frömd z si. Stattdesse heiter d Lüüt im Team gäge mich ufgmischt.

Alli gäge eis.

Voll easy.

Z Problem isch halt, das me offnigi Konflikt nur cha kläre, wenn mer zämme drüber redet. Negativi Sache cha me nur verändere, wenn me häre luegt und sech derzue entscheidet z interveniere.

Leider isch das nöd passiert und so het me d Chance verta, irgendöbis besser z mache.

Z Muul hani mir Wund gredet, aber mini Wort hei kei Frücht treit.

Ich han alles woni ha in euch investiert.

Immer wiider, egal wie beschisse mirs gange isch.

Egal öbi die ganz Nacht wäg mire Psyche nid ha chönne schlafe, egal wie viel Innerlech und Üsserlech Schmerz ich ka han.

Ich han immer jedi Sekunde alles gäh.

So viel mer isch, bin ich die einzig vom Team wo die Leistig konstant düreghet het.

Also chömmet mir nid dermit, dases selbstverständlech isch.

Dir sit ja z beste Bispiel derfür, dases absolut nid so isch.

Stellet nech vor, d Bewohner heis mitübercho. Die hei mich und mini Leistig gseh.

Jede Tag hei sie mich mit Komplimänt überschuttet, mini Arbeit het bi ihne Frücht treit.

Sie hei mer immer wiider gseit, dass niemmer so schaffet wie ich.

Ihne isch bewusst worde, wer ich bin und das ich für sie kämpfe, egal gäge wär.

Sie heis gschätzt und honoriert.

Es het sini Kreise zoge, dases bis z hingerst und z letzt jede gwüsst het.

Ich han ihri Dankbarkeit und ihri Werschätzig jede Tag dörfe gspühre.

Ich han dert wo verzwiflig gherrscht het, es Liecht entflammt.

Dert wo d Truurigkeit überwiegt het, hani es Lächle vorglockt.

Dert wo Wuet gherrscht het, hani Friide bracht.

Ich han Ressource gförderet, ufbaut und Muure abegrisse.

Dert wo beschisse gschaffet worde isch, hanis wiider grad grückt und dert wo me ihne d Würd gno het, hani se ihne wiider zrug gäh.

All das erfüllt mich mit Stolz und zeigt mir jede Tag ufs neue, das ich nid das bin, wo ihr versuecht heit us mir z mache.

Ich verlier mis Gsicht nid, darum gahni au. Denn ich muess mit niemmerem zämme schaffe, wo mini Erkrankig triggeret und mir z Gfüehl git, wertlos und untragbar z si.

Ich bin nöd untragbar, ich bin so viel meh als wärtlos.

Wer nur mini negative Siitene betrachtet, mich stigmatisiert und mir dr Bode unger de Füess wägriesst, het mich nöd verdient.

Darum verlahni das sinkende Schiff, zwar mit Träne i de Auge, wills mir unglaublech leid duet für d Bewohner.

Aber ich cha nid bliibe ohni mis Gsicht z verlüre.

Und das nimmt mir niemmer, nid mal ihr.

Ich mach mit derre Leistig genau so wiiter bis zum Schluss.

Ich wird nach wie vor immer da si und immer 150% gäh.

Das wird min gross Abgang si.

Mini letzti Tat, mis Testament, mis Verspräche.

‍