Heey - Wie gahts dir?

Sälü zämme.

Wie gahts eu?

‍

Die Frag isch würk ernst gmeint, nid als ne blödi Floskle, nid als en Standartfrag, nid als es oberflächlechs Kratze oder en Afang vore längwillige Konversation.

Ich meins zu 100% ernst.

‍

Us eigeter Erfahrig, weiss ich, das me meistens uf die Frag nid zu 100% wahrheitsgemäss antwortet.

Dadefür gits verschiideni Gründ.

Villech het me Angst, vore falsche Reaktion.

Villech vertraut me am gegenüber nid.

Villech isch me au en Mönsch, wo sis innere nid gern zeigt.

Es cha jensti Gründ gäh, wiso me nid ehrlech die Frag beantwortet.

Derbi isch die Frag doch so wichtig.

Psyche vom Mensch isch extrem erschütterbar und wenn dört öbis nüm stimmt, gahts schnell mal um Lebe und Tod.

‍

Wie oft händ ihr scho erläbt, dass dir uft Frag "wie gahts dir" nid wahrheitsgetreu gantwortet heit?

Was het das in eu usglöst?

‍

Mir passiert das ca.

30mal am Tag.

Bim schaffe, ir Kommunikation mit diverse Mensche.

Etc.

Dennoch han ich so oft ghofft, das me hinter mire Lari Fari Antwort, min wirklich Gmüetszuestand gseht.

Ich mein, genau im hie und jetzt gahts mir echt beschisse.

Mini Psyche isch erschütteret und ich kämpf gäge sehr viel Dämone.

S schlimmschte a all dem isch, dass ich mich einsam füehle.

Nid allei, sondern würklech einsam.

‍

Derbi möchti doch mit de Mensche um mich ume in Verbindig trätte.

Also wiso zeig ich mich denn nöd?

Us eigeter Erfahrig weiss ich, gad wes um Psychischi Erkrankige, Giftsätz und irgendwelchi Störige - wo nid id Norm passt - gaht, mache vieli Mensche zue.

‍

Wieso eigentlech?

Ich mein jede Mensch uf derre Erde het mindestens scho e schlächte Tag ka.

Jede Mensch isch sicher mal imne Loch gsi oder het öbis herts müesse bewältige wo ihn prägt het.

‍

Also, wieso mache mir nid eusi Ohre uf und loset eifach mal zue?

Wieso frage mer nid ärnsthaft nache?

Wieso trätte mir nid wahrhaftig ine Verbindig?

‍

Ja ich weiss, d Welt isch aktuell am unger gah, keis Wunder bi all dem Scheiss wo uf dem Planet lauft.

Aber langsam sötte mir doch paar Grundsätz glernt ha.

Zb. Das me en Mensch nid nach sim üssere söt beurteile + verurteile.

Oder das me sich au mal uf öpper söt Iihlah, wo nid zu 100% is Beuteschema passt.

Oder das me en Mensch so söt akzeptiere, wie er isch, mit all sine Ecke, Kante und Rundige.

Denn jede Mensch uf derre Welt isch doch wertvoll.

Jede Mensch het en Berechtigung, dörfe z existiere und glücklech z si.

Jede Mensch isch es Individuum.

‍

Also schaffet doch eues Jagdschema ab.

Ich mein, irgendwenn ischs doch längwillig, geng wiider z gliiche Ziel z verfolge.

Schlussamend bringt eim s gliiche au nid wiiter.

‍

Also häbet dr Muet, anders z si.

Öffnet euri Seel und eues Herz und schaffet Ruum, für wunderbari + tiefgründigi Begägnige.

‍

Ich fahr dermit a und rüef e neui Challenge is Läbe Namens:

‍

Unbekehrti / Entgegegsetzti Psychologie.

‍

Jede vo eu darf mitmache.

Zeiget mir eui Hobbies in Bilder.

Egal wases isch, egal öb Zeichne, Fotografiere, Musik, Büecher läse oder Texte schriibe.

Spielt gar kei Rolle.

D Hauptsach isch, es git dir Chraft.

‍

Was hilft dir, für usere Kriise usse z cho?

Was macht dir Muet?

Was baut dich uf?

Was stärkt dich?

Was beruhigt dich?

Was hilft dir mit negative Sache und de zeriessende Giftsätz umzgah?

Was hilft dir uf dir selber z baue?

Was lenkt dich ab?

Was erreicht dich i dine dunkelste Zyte?

Was heilt dich?

Uf was bisch du stolz?

Was liebsch du a dir?

‍

Sãg mir, was d Spiitze vom Ice Berg bricht.

Teil mir mit was dich reaktiviert und dich usfüllt.

‍

S Lebe isch voll mit negative Sache.

Berg und Talfahrte, Unfreiwillige Achterbahnfahrte, Ängst und Ablähnige, Enttüschige und Verletzige, Dramas, Traumata, Blöde Mensche wo eim weh machet, No blöderi Handlige, schlechte Entscheidige, Wuet, Hass, Truur und Verletzige, wo me glaubt, dases für die kei Heilig git.

‍

Me glaubt, dr Schmerz sigi nid abschaltbar.

Me glaubt villech sogar, me muess drann stärbe.

Me hinterfragt und zwiiflet a allem.

Me vertraut niemmerem meh und schlüsst sich ii, will me verletzt, kränkt und im Stolz broche isch.

Villech füehlt me sech gedemüetigt, bruucht und denn einfach entsorgt.

So wie es Spielzüg, wo me nachem bruuche, wieder in Schrank zrug stelle chan.

‍

Nur vergiss nie, du bisch viel meh wert als das.

Du bisch kostbar und unbezahlbar.

Genau i denne Situatione, definiersch du din Wert selber.

La dir nie vo öpperem la säge, wie viel Wert du bisch.

Find zrug zu dir.

Dert wo du nüm d Chraft vo usse chasch zieh, muesch dermit afa, für dich selber iizstah und für dich selber z kämpfe.

Denn schlussendlech, spilsch du allei d Hauptrolle i dim Lebe.

Ohni di isch dr Film fertig und s Buech gschlosse.

‍

Es isch wichtig, dass me es Zeiche setzt.

Es isch nid geng alles Friede, Freude und Eierkuchen.

Mängisch duet das fucking Lebe echt weh.

‍

Nimm din Schmerz.

Nimm dini Wuet.

Nimm dini Truur  + dini Verletzige und Verwandle sie in öbis schöns.

La dich nid la Stemple und entscheid du selbstständig über dini Prägige.

‍

Du hesch so viel meh wert, als anderi Mönsche gseh und säget.

Scheiss egal, öb sie das checket oder nid.

Es gaht um dich + dis Inne lebe.

Anderi Mönsche chömme und göi.

Mängisch hingerlöi sie e Fuessabdruck, oder wiirble biz Staub uf, einigi Bsuecher si nid mal erwähnentswert und bi andere Mensche isches verdammt hert, we sie nüm i dim Lebe sind.

‍

Aber schlussendlich laufsch du din Weg.

Du bisch wichtig, individuell und grossartig.

Egal öb du es weichs Herz hesch, en Gfüehlsmensch bisch.

Au egal, wennt mãngisch biz naiv bisch und dich schnell uf öbis iilahsch, will me dich prompt catched.

Du lebsch das Lebe in volle Züg, mit jedere Fasere vo dim Körper, mit allem wo du hesch und bisch.

Mit all dine Gfüehl und Emotione.

Du gspührsches.

‍

Genau das fehlt vielne Mensche.

Das gitses nur no selte.

Aber das macht dich empathisch.

Genau das ischs wo die Welt brucht.

Das isch wahrhaftigi Mönschlechkeit, wo die Erde rette cha.

‍