Glow In The Dark

Über d Siliva

Zu mim Twin gits ungloublech viu z säge, wöu mä sie und ihres Wäse, nid eifach i Wörter beschribe ka.
Doch ig probier trotzdem, öbis über sie z schriibe, ohni äs ganzes Buäch z fülle.
We ig mi frage, welli Eigeschaft, ig a ihre am meistä liebä, fauts mir relativ schwär, eini vo ihrne 100 tolle Eigeschafte ussä z suäche, da sie so vieli tolli Eigeschafte het.
Was ig aber immer wider bemerkä, isch ihres grosses Härz und ihri extremi Hiufsbereitschaft die sie im private, aber vorallem bim schaffe a Tag leit.
Sie luägt immer, dases dä andere guät geit und sie nid uf dr Strecki bliibe, so sehr dass sie sech oft säuber vergisst.
Was mängisch nid so eifach isch.
Sie isch ä Meisterin, im ihri Problem z schlücke und sie z verdränge.
Sie drückt sä eifach innä dunkli Eggä, ir Hoffnig, dass sie sech säuber uflöse.
Vieli Mönsche wüsse das nid.
Sie findes zwar schön, das min Twin, sich um sie kümmeret und so ufopferigsvoll isch, gseh aber oft nid, dass sie vergisst, sech mau um sich selber z kümmerä.
Sie chõmme au nid uf d Idee, sich mal um sie z kümmere.
Und genau da, kumme ig is Spiu.
Mini Ufgab isches nid, sie über mini Problem z stellä, oder mich wäge ihre z verlierä.
Aber wenn ig sie nid hät, wär ig sehr oft allei.
Und obwohl ig dr Wahrheit, nid is Oug luäge möcht, isches eifach dWahrheit.
Darum bi ig die, wo sech mit ihre zämme,  i die dunkli Eggä steut, um ihri und ou sehr oft ou mini Problem azluägä, dermit me se chöi bennenä, um se, wenns geit ou z löse.
Bi mir muäss sie sech nie versteckä oder ä Maske trage. Wöu ig sä unändlech fest liebe und sie mr dWält bedütet.
I dä letschtä Mönet si mr mega zämegwachse.
Mir si üs no nie so nöch gsi wie jetzt.
Ohni sie wär ig villech nid ganz einsam, doch würd mr dr wichtigst Mönsch uf Ärde fähle.
Niemer kennt mi so guät wie sie und äs git nüt, über das ig nid mit ihre redä könnt.
Sehr oft wärs toll, wenn sie sech dür mini Ouge gseh könnt, wie wunderbar, hilfsbereit, wunderschön, liebevoll, kraftvoll, zauberhaft, humorvoll und einzigartig sie isch.
Sie muässt nid immer öbis leistä, damit sie d Liebi verdient.
Denn sie isch und blibt liebeswärt!
Und sie het Mönsche i ihrem Läbe verdient, wo sie liebe und sie guät behandle und acht uf sie gäbe.
Mönsche wo ihres Potenzial gseh und fördere, damit sie no meh wachse ka.
Aber ou sie darf lernä, sich meh s liebe und s akzeptierä und ja zu sich z säge.
Sich meh wärtschetzä und stolz uf sech z si.
Äs isch immer so eifach, über sich säuber s urteilä und sich selber z richte u fertig z mache.
Das dörft nid si.
Sie darf und söu strahle.
Sie darf und söu Bärge versetzä.
Sie darf und söu wachse.
Sie darf und söu läbe.
Sie darf und söu lache.
Sie darf und söu liebä.
Und nüt und niemer, het s Rächt, über sie z richte und ihre dr Wärt abzspräche.
Niemmer.
Denn, die Würde des Menschen ist unantastbar!
Silä, ig lieb di über alles und bi so froh das ig di ha.
Vergiss das nie.
Und lah nid zuä, das anderi, oder dis Bordi, di z fest abäzieh.
Wenn du mau, dis Liecht im Dunkle verlürsch, lüchte ig für di.
Ig steuä mi mit dir vor dinä Problem, damit du kasch heilä.
Denn du hesches verdient.
Mir zwöi, gäge dr Räst vor Wält, mis Härz.


Gschriibe vor Ramona für d Silvia